தாழ்த்தப்பட்டவர்கள் என்ற காரணத்தால் விமான பணிப்பெண்கள் வேலைக்கு தேர்வு செய்யப்படாத பெண்கள்.

சென்னை:விமானப் பணிப்பெண் வேலைக்காக அரசு சார்பில் பயிற்சி பெற்ற ஆதிதிராவிடப் பெண்களில் ஒருவர் கூட நேர்முகத் தேர்வில் தேர்ந்தெடுக்கப்படவில்லை. இதற்குக் கூறப்பட்ட காரணம் அவர்களுக்குப் போதிய ஆங்கில அறிவு இல்லையாம்.

தமிழக அரசின் ஆதிதிராவிடர் நலத் துறை சார்பில், ஆதிதிராவிடர் மற்றும் பழங்குடியின பிரிவைச் சேர்ந்த பெண்களுக்கு விமான பணிப் பெண் (ஏர் ஹோஸ்டஸ்) பயிற்சி அளிக்கும் திட்டம் கடந்த 2006ம் ஆண்டு தொடங்கியது.

இதுவரை மொத்தம் சுமார் 200 பெண்கள் பயிற்சி பெற்றுள்ள இத்திட்டத்திற்காக ஆண்டுக்கு மொத்தம் ரூ.1 கோடியை அரசு செலவிட்டது. தனியார் ஏர்ஹோஸ்டஸ் பயிற்சி நிறுவனத்தின் மூலம் பெண்களுக்கு பயிற்சி அளிக்கப்பட்டது.

ஆனால், இப்பயிற்சி முடித்த பெண்கள் ஒருவருக்கும் இதுவரை விமானப் பணிப்பெண் வேலை கிடைக்கவில்லை எனக் கூறப்படுகிறது.

பயிற்சி பெற்ற பெண்கள் இதுபற்றி கூறுகையில், 'நாங்கள் கறுப்பாக, குட்டையாக இருக்கிறோம். அழகாக இல்லை. எனவேதான் எங்களுக்கு வேலை கிடைக்கவில்லை என்று சிலர் சொல்கிறார்கள். அப்படியானால் எங்களை ஏன் தேர்ந்தெடுத்து பயிற்சி கொடுத்தார்கள்' என்று வருத்தத்துடன் தெரிவித்தனர்.

ஆனால் பயிற்சி பெற்ற பெண்களுக்கு தகவல் தொடர்பில் எதிர்பார்த்த அளவுக்கு திறன் இல்லாத காரணத்தாலேயே வேலை கிடைக்கவில்லை என தனியார் விமான சேவை நிறுவன அதிகாரிகள் காரணம் கூறுகிறார்கள்.

தீவிரவாத சிவசேனையின் செல்வாக்கு மும்பையில் குறைந்துவருகிறது.

மும்பை: காங்கிரஸ் கட்சியின் பொதுச்செயலாளார் ராகுல் காந்தியின் செயலால் அவருக்கு மும்பை மக்கள் மத்தியில் செல்வாக்கு அதிகரித்துள்ளது அதேசமயம் சிவசேனா மற்றும் நவநிர்மான் சேனா ஆகிய மொழி ரீதியிலான தீவிரவாத அமைப்புகளுக்கு பலத்த பின்னடைவு ஏற்ப்பட்டுள்ளது.

தீவிரவாதி பால்தாக்கரேயின் மராட்டியம் மராட்டியர்கள் என்ற கூக்குரலுக்கு பதிலளித்த காங்கிரஸ் பொதுச் செயலாளர் ராகுல் மும்பை எல்லோருக்கும் சொந்தமானது என்றார் மேலும் அவர் சிவசேனாவின் மிரட்டலை புறக்கணித்து நேற்று மும்பையில் சர்வசாதாரணமாக சுற்றுப்பயணத்தை மேற்க்கொண்டார். இது சிவசேனா மற்றும் நவநிர்மாண் சேனா ஆகியவற்ருக்கு பெரும் சரிவை ஏற்ப்படுத்தியது.

மும்பைக்கு ஹெலிகாப்டரில் வந்த ராகுல் காந்தி நான்கரை மணிநேரம் மும்பையில் சுற்றினார் அவருக்கும் அவருடைய நிகழ்ச்சிக்கும் எந்த இடத்திலும் பாதிப்பு ஏற்படவில்லை.

விலே பார்லே என்ற புறநகர்ப் பகுதியிலிருந்து கட்கோபர் வரைக்கும் மின்சார ரயிலில் பயணித்ததும், மராத்தி அரசியலின் மையப் புள்ளியாக கருதப்படும் தாதருக்கு அவர் சென்றதும் சிவசேனா சரிந்து போனதற்க்கு காரணமாக அமைந்தது.

சிவசேனை vs பாரதிய ஜனதா ஒரு கேவலப்பட்ட கூட்டணி.

மும்பை மராத்தியர்களுக்கே என்ற சிவசேனாவின் கருத்துகளுடன் பாரதீய ஜனதா கட்சி வேறுபடுகிறது என்றும் ஆனால் சிவசேனாவுடனான கூட்டணி தொடரும் என்றும் அக்கட்சி கூறியுள்ளது.

கட்சியின் கொள்கையை எங்கள் கட்சித் தலைவர் நிதின் கட்காரி தெளிவாகக் கூறிவிட்டார். ஜம்மு காஷ்மீர் உள்ளிட்ட இந்தியாவின் அனைத்துப் பகுதிகளும் ஒன்றே என்று என்பதுதான் கட்சியின் கொள்கை. மொழி, ஜாதி, மத வேறுபாடின்றி அனைவரும் இந்தியரே என்று பாரதீய ஜனதா கட்சித் தலைவர்களில் ஒருவரான வெங்கையா நாயுடு கூறினார்.

இந்தியர்கள் நாட்டின் எந்தப் பகுதிக்கும் சென்று, குடியேறி, சட்டம் அனுமதிக்கும் எச்செயலையும் செய்ய அவர்களுக்கு உரிமை உண்டு என்றும் அவர் கூறினார்.

குறிப்பிட்ட இந்தப் பிரச்சனையில் எங்கள் கட்சியின் நிலையை கட்சித் தலைவர் நிதின் கட்காரி ஏற்கனவே தெளிவுபடுத்திவிட்டார். இந்தப் பிரச்சனையில் எங்களுக்கும் சிவசேனாவுக்கும் இடையே கருத்துவேறுபாடு உள்ளது என்றும் வெங்கையா நாயுடு கூறினார்.

பாலிவுட் சூப்பர் ஸ்டார் ஷாருக் கானை மிரட்டும் சிவசேனை மொழி வெறியர்கள்.

லண்டன்: நான் வாபஸ் பெற வேண்டும் என்று சொல்பவர்களிடம் நான் கேட்கும் ஒரே கேள்வி- எதை வாபஸ் பெறச் சொல்கிறீர்கள்?, நான் இந்தியன் என்று சொன்னதையா? என்று கோபமாக கேட்டுள்ளார் பாலிவுட் சூப்பர் ஸ்டார் ஷாருக் கான்.

பால்தாக்ரே மற்றும் சிவசேனை தீவிரவாதிகள் வெறி பிடித்த வேங்கை போல கைக்குக் கிடைத்தவர்களையெல்லாம் கடித்துக் குதறிக் கொண்டு இருக்கின்றனர். இப்போது ஷாருக் கானை குறி வைத்து விளையாடிக் கொண்டிருக்கிறார்கள் தாக்கரே அன் கோவினர். பாகிஸ்தான் கிரிக்கெட் வீரர்களை ஐபிஎல் போட்டிகளில் சேர்த்திருக்க வேண்டும் என்று சொன்னார் என்பதற்காக அவரை சரமாரியாக விமர்சித்துக் கொண்டிருக்கிறார்கள்.

ஷாருக் கான் நடித்த மை நேம் இஸ் கான் படத்தை மும்பையில் திரையிடக் கூடாது என்று மிரட்டிக் கொண்டிருக்கிறார்கள். இவர்களுக்குப் பயந்து தியேட்டர்காரர்கள் பின்வாங்கத் தொடங்கியுள்ளனர். தனது பேச்சை வாபஸ் பெற வேண்டும், மன்னிப்பு கேட்க வேண்டும் என்று தாக்கரேக்கள் ஷாருக் கானுக்கு கெடு விதித்துள்ளனர்.

இந்த நிலையில் லண்டனில் செய்தியாளர் கூட்டத்தில் பங்கேற்ற ஷாருக் கான் மிகவும் உணர்ச்சிகரமாக பேசினார்.அவர் கூறுகையில், பாகிஸ்தான் வீரர்களுக்காக நான் பேசியதை வைத்து எனது தேசப்பற்று குறித்து சிவசேனாவினர் கேள்வி கேட்பது மிகவும் விரக்தியாக உள்ளது. கோபத்தை ஏற்படுத்துகிறது.

எதை வாபஸ் பெற வேண்டும் என்று கேட்கிறார்கள். நான் இந்தியன் என்று சொன்னதையா அல்லது எனது நாட்டுக்கு யாரும் வரக் கூடாது என்று சொல்லச் சொல்கிறார்களா?. எனது தந்தை இந்த தேசத்திற்காக போராடிய ஒரு சுதந்திரப் போராட்ட தியாகி. அவர் எனக்கு அப்படி எதையும் சொல்லித் தரவில்லையே.

எனது நாட்டில் நடைபெறும் ஒரு மிகப் பெரிய நிகழ்ச்சியைக் காணவும், அதில் பங்கேற்கவும் அனைத்து மக்களும் வர வேண்டும் என்றுதான் நான் விரும்பினேன். அதைத்தான் சொன்னேன். இந்தியா நமது நாடு, இந்தியர்கள் அனைவரும் நமது சகோதரர்கள் என்று 3ம் வகுப்பு முதலே பள்ளிக் கூடத்தில் நாம் அனைவரும் படித்தோம். நானும் படித்தேன். இன்றும் கூட அப்படித்தான் குழந்தைகளுக்கு சொல்லிக் கொடுக்கிறார்கள். நான் மாஸ்டர் டிகிரி முடிக்கும் வரையிலும் கூட அப்படித்தான் புத்தகங்களில் இருந்தது. இதைத்தான் எனது ஆசிரியர்களும், பெற்றோர்களும், எனது தாயும் எனக்குச் சொல்லிக் கொடுத்தார்கள்.

ஆனால் இன்று நடப்பவற்றைப் பார்த்தால் அவை எல்லாம் தவறு என்றுதான் நாம் சொல்ல வேண்டும்.உண்மையில் இப்போது என்ன பிரச்சினை என்றே புரியவில்லை. என்ன நடந்து கொண்டிருக்கிறது என்றே புரியவில்லை. நம் நாட்டுக்கு யார் வந்தாலும் திறந்த மனதுடன், இரு கைகளையும் கூப்பி வரவேற்பதுதானே நமது பண்பாடு என்று சொல்லிக் கொடுத்தனர்.

அது கலைத் துறையாக இருந்தாலும் சரி, கலாச்சாரம், விளையாட்டு, அரசியல், எந்தத் துறையாக இருந்தாலும் சரி, அப்படித்தானே சொல்லிக் கொடுத்தனர். அவையெல்லாம் தவறா?.இந்த நாட்டில் வசிக்கும் அனைவருக்கும், அவரவர் விருப்பபடி பேசும், செயல்படும் சுதந்திரம் உண்டு. அதனால்தான் உலகின் மிகப் பெரிய ஜனநாயக நாடாக இந்த நாடு திகழ்கிறது.

ஆனால் நான் பேசியது எனது வர்த்தக பங்குதார்களை பாதிக்கிறது என்பதை நினைத்தால் வேதனையாக இருக்கிறது. நான் பேசியதால் எனது படத்திற்குப் பாதிப்பு வந்திருப்பது வருத்தம் தருகிறது.எனது கருத்தில் அவர்களுக்கு மாறுபாடு இருக்குமானால் அவர்கள் என்னைத் தாராளமாக அணுகலாமே, அதை விடுத்து படத்தைத் தடுப்போம் என்பது எப்படி சரியாகும்.

இந்தப் படத்தில் நான் மட்டும் இல்லையே. கஜோல் இருக்கிறார், கரண் (ஜோஹர்) இருக்கிறார். 150க்கும் மேற்பட்ட தொழிலாளர்களின் உழைப்பும், அவர்களின் வாழ்க்கையும் கூட இருக்கிறதே. இந்த மிரட்டலுக்கு நான் நிச்சயம் பணிய மாட்டேன். என்னால் கரண் ஜோஹருக்கும், கஜோலுக்கும் ஏற்பட்டுள்ள சிரமத்திற்காக நான் மன்னிப்பு கேட்டுக் கொள்கிறேன். இந்தத் திரைப்படம் தொடர்பான அனைத்து வர்த்தக பங்குதாரர்களிடமும் மன்னிப்பு கேட்டுக் கொள்கிறேன். என்னால் அவர்களுக்கு பாதிப்பு ஏற்படுவதை நான் வேதனையுடன் பார்க்கிறேன் என்றார் ஷாருக். பிப்ரவரி 12ம் தேதி இப்படம் உலகெங்கும் திரையிடத் திட்டமிடப்பட்டுள்ளது. இந்த நிலையில்தான் தீவிரவாதி தாக்கரேக்கள் மூலம் மும்பையில் சிக்கல் வந்துள்ளது.

இந்தி பேசும் 'கமாண்டோக்கள்' வேண்டும்- இந்திக்காரர்கள் கூடாதா? தாக்கரேக்களுக்கு ராகுல் கண்டனம்.

வட இந்தியர்களை தொடர்ந்து குறி வைத்து கடித்துக் கொண்டிருக்கும் பால் தாக்கரே மற்றும் ராஜ் தாக்கரே ஆகியோரை நேற்று கடுமையாக கண்டித்துப் பேசினார் ராகுல் காந்தி.

பீகார் மாநிலம், புத்தகயா வந்த அவர் அங்கு தலித் இளைஞர் தலைமைத்துவ மேம்பாட்டு மாநாட்டில் கலந்து கொண்டார்.

அப்போது பேசுகையில், மகாராஷ்டிராவில், மகாராஷ்டிர நவ நிர்மான் சேனா தலைவர் ராஜ் தாக்கரே, பீகாரிகளையும், உத்தரப் பிரதேசத்தைச் சேர்ந்தவர்களை மகாராஷ்டிராவை விட்டும், மும்பையையும் விட்டும் தூக்கி எறிய வேண்டும் என்று கூறிக் கொண்டிருக்கிறார்.

ஆனால், மும்பையைத் தீவரவாதிகள் தாக்கியபோது அவர்களைக் கொன்றது யார்? அவர்கள் அனைவரும் பீகாரிகள், உ.பியைச் சேர்ந்தவர்கள் மற்றும் நாட்டின் பிற மாநிலங்களைச் சேர்ந்தவர்கள். அப்போது பீகாரிகளைத் தூக்கி எறிய வேண்டும் என்று அவர்கள் ஏன் சொல்லவில்லை?.

இந்தி பேசும் கமாண்டோக்கள் இருக்கலாம், ஆனால் இந்தி பேசுவோர் இருக்கக் கூடாதா? தீவிரவாதிகளுடன் சண்டை போடவாவது பீகாரிகள் அங்கேயே இருக்கட்டுமே என்றார் ராகுல் காந்தி.